1Cor 2 | ATA | STEP | Ta vivilo, no mine eni ene'e noxinge ea'alomengi lamana no anu vaikala noxou Lataua, la eni ea'alomengi no anu vaikala pekipekia'u mo lavulavu tatila uasi.

a 2:3Apo 18:9; 2Ko 10:1

b 2:41Te 1:5

c 2:9Ais 64:4

d 2:16Ais 40:13

1 Corinthians 2

A'alo sou Soli noxou Kalisito no Anu Ovu Valautu

1 Ta vivilo, no mine eni ene'e noxinge ea'alomengi lamana no anu vaikala noxou Lataua, la eni ea'alomengi no anu vaikala pekipekia'u mo lavulavu tatila uasi. 2 Xo eni emasaxa lexe no mine eni exolu lai noxinge ne la axavutala no anu mii vile la uasi, ia Iesu Kalisito anusisi mo soli noxou no anu ovu valautu. 3 ^aEni ene'e noxinge ne eni mamalaxosi mo e'olo'olo mu'oki xe e'ume. 4 ^bVaivaikala noxilo mo a'alo noxilo ne ulaa no anu lavulavu tatila mo vaikala pekia'u uasi. Ia no anu vaikala ane sou umaxa'u xavi no anu Uleenu Tavuna. 5 Mo sou ngingi ngamuxaxu tangengi no anu lavulavu laixe noxi'a ta mitema uasi, ia no anu xavi noxou Lataua.

6 Manina, nexi tevivikala no anu a'alo sou xavutala laixe ulai noxi'a ta mitema ane lingamoxa'a. Ia xavutala laixe ane ne anu sou lialia 'o mo noxi'a ta kisokisou sou lialia 'o uasi xo ane'i ne ulai la tasiauxa'asi. 7 Uasi, nexi tevivikala no anu xavutala talume laixe noxou Lataua. Xavutala laixe e mutalume ne Lataua muitinexe lumamo no mine ukoinu lialia'o uao. 8 Ta kisokisou vile sou lialia 'o ne ulavusou uasi, xo lexe ane'i milavusou, la umomomo sou ane'i ivau Tila sou mimii laixe 'o usoli no anu ovu valautu uasi. 9 ^cIa uasi xo kaukavu muai no Lavuku Tavuna teinu aloxo 'o,

“Mii ane itema vile umaisou uasi
mo sangalou ulomusou uasi
xe uxali no anu xavutalau uasi ne.
Lataua muloosi'a ane'i ane imasaxau Lataua Uleenu no tane'i manina.”
10 Ia Lataua mupala'alixu noxinge no anu Uleenu. Uleenu ne ukakamulinu mimii ukalusi, mo loxo mimii utalume no nano noxou Lataua ne anu mulavusou. 11 Xo itema vile ulavusou xavutalau itema vile uasi ia mitema ne anu uleenusi ane molu mulavusou anu aloxo itema vile ulavusou xavuxavutala noxou Lataua uasi, ia anu Lataua Uleenusi molu mulavusou. 12 Nenge tano'u Uleenu ane sou lialia 'o uasi. Ia teno'u Uleenu ane molu noxou Lataua. Sou lexe nenge talavusou mii ma'ia ane Lataua mulosingesi. 13 La sou mii ma'ia e nenge tavivikala no anu ne itema ulosoiengixu uasi. Ia no anu vaivaikala e Uleenu Tavuva mulosiexixu. La sou nenge talamananixu mimii no anu Uleenu manina no nano no anu vaivaikala noxou Uleenu. 14 Ia ta mitema ane Uleenu noxou Lataua uxolu noxi'a uasi ne imomomo sou ino'u mii ane une'e no anu Uleenu noxou uasi. Xo vaikala noxou Uleenu uxali mii vitanisi noxi'a mo anu ulavusi'a uasi. Ia ane'i milavusou mii ma'ia ane Uleenu ulemolu noxi'a ne. 15 Itema ane mu'ana'ana no anu Uleenu Tavuna ne, la anu ulevinu mimii ukalusi, ia evile umomomo sou ulevinu uasi. 16 ^dXo

“'Ena'ei mulavusou xavutala noxou Tila mo ulosou xavutala?”
Ia nenge telavusou xavutala noxou Kalisitosi.